Президент елдің деректер экономикасына көше бастағанын және мемлекеттік қызметтер мен қаржы саласын өзгертіп жатқан цифрлық платформалар іске қосылғанын мәлімдеді, деп хабарлайды CMN.KZ
Қасым-Жомарт Тоқаев төрағалығымен Жасанды интеллектті дамыту жөніндегі кеңестің екінші отырысы өтті. Мемлекет басшысы цифрлық экономика қазірдің өзінде әлемдік ЖІӨ-нің 15%-дан астамын қалыптастырып отырғанын, ал бәсекелестік деректер мен технологиялар жағына ойысқанын атап өтті.
«Бұл трансформация әзірге елімізге ішінара ғана әсер етті. Өткен айда Қазақстан кедендік рәсімдеудің бірыңғай KEDEN платформасын іске қосып, маңызды қадам жасады. Енді декларацияны рәсімдеу уақыты бір минуттан аз, құжаттардың басым бөлігі автоматты түрде өңделеді», – деді Тоқаев.
Оның айтуынша, қатар жүріп ұлттық логистикалық Smart Cargo платформасы құрылып жатыр. Ол 127 дереккөзбен жұмыс істеп, бизнес үшін шекарадан өту процесін жеделдетеді.
«Салықтық әкімшілендірудің интеграцияланған жүйесі құжаттарды өңдеу уақытын бір сағаттан бір минутқа дейін қысқартты. Бұл екі миллион салық төлеуші үшін қызметті жеңілдетті», – деп атап өтті президент.
Сондай-ақ 78 дереккөзден – мобильді аударымдардан бастап әуе сапарларына дейінгі мәліметтерді жинайтын Smart Data Finance платформасы іске қосылды.
«Бюджетті онлайн-мониторингтеу жүздеген миллиард теңгеге тең тәуекелді төлемдердің алдын алуға мүмкіндік береді. Ұлттық тауарлар каталогы негізінде мемлекеттік сатып алулардың аналитикалық моделі қалыптасып жатыр. Бұл жыл сайын 200 миллиард теңгеден астам қаражатты үнемдеуге жол ашады», – деді Тоқаев.
Президент Қазақстан деректер экономикасына толыққанды көшу мен жасанды интеллектіні негізгі салаларға енгізуді енді ғана бастап жатқанын атап өтті.
CMN.KZ ресми Telegram арнасына жазылыңыз
