MV Hondius кемесіндегі індеттен кейін мамандар Қазақстан үшін қауіп бар-жоғын түсіндірді, деп хабарлайды CMN.KZ
Andes orthohantavirus вирусы Қазақстан аумағында таралмаған. Бұл туралы Ұлттық қоғамдық денсаулық сақтау орталығы хабарлады.
Елдегі хантавирустық инфекциялар эпидемиологиялық бақылауда тұр. Қазақстан инфекциялық қауіптерге тұрақты мониторинг жүргізеді, ал зертханалар мен мамандар ықтимал жағдайларды анықтап, әрекет етуге дайын екені айтылды.
Шетелге сапарларға байланысты инфекциялардың сырттан келу қаупі сақталады. Сондықтан мамандар шетелге шығар алдында эпидемиологиялық жағдайды, соның ішінде Saqbol денсаулық қауіптері картасы арқылы алдын ала тексеруге кеңес береді.
«Жабайы кеміргіштермен және олардың жиналуы мүмкін орындармен байланыстан аулақ болу, өлі жануарларға және олардың бөлінділеріне қорғаныс құралдарынсыз тимеу, жабық бөлмелерді тазаламас бұрын желдету, жеке гигиенаны сақтау, тек қауіпсіз су ішу және азық-түлікті қорғалған қаптамада сақтау ұсынылады. Қазіргі уақытта халықтың алаңдауына негіз жоқ», – деді мамандар.
Еске салайық, бұған дейін Дүниежүзілік денсаулық сақтау ұйымы MV Hondius кемесіндегі Andes вирусының өршуі коронавирус сияқты таралмайтынын мәлімдеген. Ұйым мәліметінше, сегіз адам вирус жұқтырған, олардың үшеуі қайтыс болған. ДДСҰ бұл жаңа пандемия емес екенін атап өтті.
CMN.KZ ресми Telegram арнасына жазылыңыз
