Қарағанды облысында бала ауруханада қайтыс болды: тексеру жүргізіліп жатыр

Бұл туралы Денсаулық сақтау министрлігі мәлімдеп, қазақстандықтарды тек ресми ақпаратқа сүйенуге шақырды. Сондай-ақ ведомство марқұмның туыстары мен жақындарына көңіл айтты.

«Облыстық денсаулық сақтау басқармасының мәліметінше, бала ауру басталғаннан кейінгі екінші күні инфекциялық орталыққа жатқызылған. Жағдайының нашарлауына байланысты жансақтау және қарқынды терапия бөліміне ауыстырылған», – делінген хабарламада.

Тексеру барысында дәрігерлер науқастың жағдайы аса ауыр екенін анықтаған. Бұл бактериялық, вирустық және саңырауқұлақтық инфекциялардың қатар жүруімен байланысты болған.

«Аурудың ағымы айқын иммун тапшылығымен, сондай-ақ туғаннан бері вакцина алмағанымен күрделенген. Бұл ағзаның инфекцияға қарсы тұру мүмкіндігін айтарлықтай шектеп, емнің тиімділігін төмендеткен», – деп түсіндірді министрлік.

Ведомство мәліметінше, балаға медициналық көмек толық көлемде және қолданыстағы клиникалық хаттамаларға сәйкес көрсетілген.

«Емдеу тактикасы бірнеше рет республикалық консилиумдарда қаралды. Оған бейінді мамандар, соның ішінде бас штаттан тыс балалар инфекционисі, балалар пульмонологы және реаниматологы қатысты», – делінген хабарламада.

Дәрігерлер экстракорпоральды мембраналық оксигенация (ЭКМО) әдісін қолдану мүмкіндігін де қарастырған. Алайда науқастың ауыр жағдайына байланысты бұл әдіс ұсынылмаған.

«Қарқынды терапия мен барлық қабылданған шараларға қарамастан, баланы аман алып қалу мүмкін болмады».

Министрлік мұндай жағдайлардың медициналық тұрғыдан өте күрделі екенін атап өтті. Ауыр инфекция, иммун тапшылығы және вакцинацияның болмауы қолайсыз нәтиже қаупін едәуір арттырады.

Сондай-ақ ведомство бұл жағдай бойынша тәуелсіз сарапшылардың қатысуымен жан-жақты тексеру жүргізілетінін хабарлады.

Қазақстандықтар мен БАҚ өкілдеріне тек тексерілген, ресми ақпарат көздеріне сүйеніп, асығыс қорытынды жасамауға және жалған ақпарат таратпауға кеңес берілді.