Астананың тұрғындары мен қонақтары үшін ұлы тұлғаның құрметіне арналған өнер туындысы пайда болды – қазақ операсының жарық жұлдызы, КСРО халық әртісі Күләш Байсейітоваға арналған мурал салынды, деп хабарлайды CMN.kz.
Мурал елорданың сол жағалауындағы тұрғын үй кешендерінің бірінің қабырғасында бой көтерген. Жоба бастамашылары мұны қазақ мәдениетінің көрнекті тұлғасы, ұлттық опера өнерінің негізін қалаушылардың бірі Күләш Байсейітованың есімін мәңгі есте қалдыру үшін жасағандарын айтады.
Бұл өнер туындысының авторы – street-art өнерінің шебері Адай Исажанов. Оның айтуынша, туындыда Күләш Байсейітованың сахнадағы ерекше бейнесі және оның ұлттық мәдениетке қосқан зор үлесі көрсетілген. Шебер әр детальды үлкен мұқияттылықпен жасап, ұлы өнер иесінің бейнесін қала тұрғындарына жақын етуді мақсат еткен.
Бұл мурал қазақ операсының тарихында мәңгі сақталатын ерекше бір белес болып, жастарды мәдени мұраны құрметтеуге және қазақ өнерінің ұлы тұлғаларын есте сақтауға шақырады.
