2024 жылдың 12 қазанында Астана қаласының халықаралық әуежайында күтпеген оқиға орын алды. ҰҚК шекара қызметі шетелдік әйелді ұстады, деп хабарлайды CMN.KZ.
Оған жалған қазақстандық төлқұжатпен елге кіруге талпынғаны үшін қылмыстық жауапкершілікке тартылу қаупі төнуде.
Оқиға барысы былай болды: шекара бекетінде күдік тудырған шетел азаматшасының құжатын тексеру кезінде оның Қазақстан төлқұжатының жалған екені анықталған. Шекара қызметі жедел әрекет етіп, ұсталған әйелдің ісін тиісті тәртіппен полиция органдарына тапсырды.
«Материалдар полиция органдарына тапсырылып, заң аясында шаралар қабылданады», — деп хабарлады ҰҚК өкілдері.
Айта кету керек, бұл оқиға жыл басынан бері жалғыз емес. 2024 жылдың алғашқы он айының өзінде мемлекеттік шекарадан жалған және өзге адамдардың құжаттарын пайдалану арқылы өтуге талпынған 198 оқиға тіркелді. Қолданыстағы заңнамаға сәйкес, жалған құжаттармен шекарадан өту — қылмыстық жауапкершілікке тартылатын ауыр құқықбұзушылық болып табылады.
