2026 жылы қазақстандық бизнес бюджеттен қосымша қаржылық қолдауға үміт арта алады. Кәсіпкерлерді қолдау жоспарлары туралы Үкімет отырысында Премьер-Министрдің орынбасары – Ұлттық экономика министрі Серік Жұманғарин мәлімдеді, деп хабарлайды CMN.KZ
Оның айтуынша, 2025 жыл жаңа салық-бюджет саясатының бастау нүктесіне айналды. Реформалардың негізгі мақсаты – өңірлер арасындағы теңсіздікті азайтып, әсіресе микро және шағын бизнес үшін кәсіпкерлікті дамытуға барынша тең жағдай жасау.
«2026 жылдан бастап фискалдық саясат бюджет кірістерін қосымша шамамен 4 трлн теңгеге арттыруды көздейді», – деді Жұманғарин.
Министр бұл қаражатты қазақстандық бизнесті дамыту мен қолдауға бағыттау жоспарланып отырғанын атап өтті. Басымдық кәсіпкерлерге қысым көрсету арқылы емес, іскерлік белсенділіктің артуы есебінен салық базасын кеңейтуге беріледі.
«Бизнес субъектілері көбірек табыс табатын жағдайда салық базасын кеңейту қағидаты негізгі болып қала береді», – деп қосты ол.
Үкіметте жаңа фискалдық модель бюджет кірістерін ұлғайтуға да, өңірлердегі экономикалық өсімді ынталандыруға да мүмкіндік береді деп күтуде.
