Жамбыл облысының қылмыстық істер жөніндегі мамандандырылған ауданаралық соты кәмелетке толмағандарға қатысты жыныстық зорлық-зомбылық туралы резонанстық іс бойынша үкім шығарды. Сотталушы, жәбірленушінің ағасы максималды мерзімге — 17 жылға бас бостандығынан айырылды, деп хабарлайды CMN.KZ
Сот анықтағандай, 2023 жылдың маусымы мен 2025 жылдың қаңтары аралығында сотталушы өзінің 2009 жылы туған кәмелетке толмаған жиеніне қатысты бірнеше рет жыныстық зорлық-зомбылық және зорлау әрекеттерін жасаған. Қылмыстар оның тұрғылықты жерінде зорлық-зомбылықпен жасалған.
Сотталушының кінәсі жәбірленушінің өкілі мен куәлердің айғақтарымен, сараптама қорытындыларымен, заттай дәлелдемелермен, сондай-ақ жасырын тергеу әрекеттерінің материалдарымен дәлелденді.
Бұлтартпас дәлелдерге қарамастан, сотталушы өз кінәсін мойындамады.
Сот сотталушының кәмелетке толмаған балаларының болуын жеңілдететін жағдай ретінде қарастырды, бірақ ауырлататын жағдайлар анықталмады. Соған қарамастан, ҚР Қылмыстық кодексінің 120 (зорлау) және 121 (сексуалдық сипаттағы зорлық-зомбылық) баптарында көзделген қылмыстардың ауырлығын ескере отырып, сот барынша жаза тағайындады.
Сотталушы екі бап бойынша да кінәлі деп танылды. Мерзімдерін ішінара қосу арқылы оған 17 жылға бас бостандығынан айыру тағайындалды. Сонымен қатар, оған балалармен жұмыс істеуге байланысты лауазымдарды атқаруға өмір бойы тыйым салынады.
Сондай-ақ, сот ер адамды жәбірленушіге:
- 5 миллион теңге — моральдық зиян үшін;
- 1,6 миллион теңге — материалдық шығын үшін өтемақы төлеуге міндеттеді.
Үкім әлі заңды күшіне енген жоқ және шағымдануға болады.
