Сенат президент Қасым-Жомарт Тоқаевтың Жоғарғы сот судьялары Досжан Амиров пен Герман Нурбаевты қызметтен босату туралы ұсынысын қолдады, деп хабарлайды CMN.KZ
Жоғары сот кеңесінің төрағасы Дмитрий Малаховтың айтуынша, Досжан Амиров зейнеткерлік жасқа толуына байланысты отставкаға кетеді. Ол бірқатар облыстық соттарды басқарды және Қазақстан Судьялар кеңесінің төрағасы қызметін атқарады.
«Досжан Сарманқұлұлы судьялар қауымдастығында лайықты беделге ие, Қазақстан Республикасы Судьялар кеңесінің төрағасы болып табылады», — деді Малахов.
Нурбаев басқа лауазымға ауысуына байланысты босатылды.
«Жоғарғы соттың тағы бір судьясы Нурбаев Герман Каримұлы, «Тәуелсіз мемлекеттер достастықтары» экономикалық соты пленумының 2025 жылғы 10 маусымдағы қаулысымен Тәуелсіз мемлекеттер достастығы экономикалық сотының төрағасы болып сайланды», — деді ол.
Досжан Амиров мансабын Петропавлда адвокат болып бастады, содан кейін сот жүйесінде отыз жылдан астам жұмыс істеді. Аудандық соттарда судья, Солтүстік Қазақстан облысында облыстық соттың мүшесі және судьясы болды. Теміртаудағы соттарды, сондай-ақ Астана мен Жамбыл облысындағы қылмыстық істер жөніндегі алқаларды басқарды. Маңғыстау, Шығыс Қазақстан және Ақмола облыстарында облыстық соттарды басқарды. 2022 жылдан бастап Жоғарғы соттың судьясы қызметін атқарды.
Герман Нурбаев өзінің мансабын ІІМ жүйесінде бастады, онда тергеуші, бас тергеуші және тергеу бөлімінің бастығы лауазымдарын атқарды. Аудандық және қалалық соттарда, содан кейін Жоғарғы сотта судья болып жұмыс істеді. Халықаралық және экономикалық құқықта тәжірибесі бар.
Сенаторлар екі судьяны босату үшін бірауыздан дауыс берді.
