Ясауи мұрасы әлем архивтерінен ізделеді: Үкімет жаңа жоспар бекітті

Үкімет 2026–2028 жылдарға арналған арнайы іс-шаралар жоспарын қабылдады. Бұған дейін мұндай тапсырманы мемлекет басшысы Қасым-Жомарт Тоқаев Түркістан облысына жұмыс сапары кезінде берген болатын.

Құжатқа премьер-министр Олжас Бектенов қол қойған.

37 жоба және 5 бағыт

Жоспар аясында 37 іс-шара жүзеге асырылады. Олар:

• құқықтық және институционалдық базаны жетілдіру;
• ғылыми-зерттеу және білім беру жұмыстары;
• мәдени-ағартушылық жобалар;
• ақпараттық және халықаралық бастамалар;
• реставрациялық жұмыстарды қамтиды.

Жастарға басымдық беріледі

Үкімет мәліметінше, жастармен жұмысқа ерекше көңіл бөлінеді. Түркістанда:

• «Ясауитану» республикалық байқауы өткізіледі;
• музей жанынан оқушыларға арналған арнайы клуб ашылады.

Мұра әлем бойынша зерттеледі

Жоспардың маңызды бөлігі – Ясауи мұрасын ел ішіндегі ғана емес, шетелдегі ғылыми орталықтар мен архивтерден іздеу.

Сонымен қатар:

• оның еңбектері мен ғылыми зерттеулерін басып шығару;
• архивтік құжаттардың бірыңғай каталогын жасау
  қарастырылған.

Туризм мен халықаралық деңгей

Ясауи мұрасын кеңінен таныту үшін:

• туристік гидтер, бейнероликтер мен аудиогидтер жаңартылады;
• шетелдік туристерге арналған жаңа маршруттар әзірленеді;
• кесенеде ғылыми-реставрациялық жұмыстар жүргізіледі.

  Сондай-ақ табылған жазбаларды ЮНЕСКО-ның «Әлем жады» бағдарламасына енгізу жоспарланып отыр. Бұдан бөлек, Ясауи жылы немесе арнайы мәдени күндер жариялау мүмкіндігі де қарастырылуда.