Шымкентте студент қызды қатыгездікпен өлтірді деген күдікпен ер адам ұсталып, қамауға алынды. Бұл туралы полиция департаментінің баспасөз қызметі мәлімдеді, деп хабарлайды CMN.KZ
Бөлімнің дерегінше, қазіргі уақытта адам өлтіру фактісі бойынша тергеу-жедел іс-шаралар кешені жүргізіліп жатыр. Құқық қорғау органдары оқиғаның барлық мән-жайын анықтап, қылмыстың ықтимал нұсқаларын тексеруде.
«Күдіктіге қатысты сот санкциясымен қамауға алу түріндегі бұлтартпау шарасы таңдалды», – деп хабарлады полицияда.
Сондай-ақ полиция департаментінде марқұмның туыстары айтқан барлық уәждер мен деректердің тексеріліп жатқанын атап өтті. Әңгіме қыздың жақындары оның қазасынан кейін әлеуметтік желілерде жариялаған жазбалар туралы болып отыр. Онда олар күдікті бұған дейін студент қызды ұрлап әкеткенін, алайда ата-анасы оны үйіне қайтарып алғанын, сондай-ақ ер адамның қызды ұзақ уақыт бойы аңдығанын мәлімдейді.
CMN.KZ ресми Telegram арнасына жазылыңыз
