Мектептердің жаңа цифрлық платформаларға көшуі мен электронды күнделіктердегі ақаулар мемлекет назарынан тыс қалмайды. Оқу-ағарту министрі Жұлдыз Сүлейменова LMS-жүйелер, қағаз күнделіктер және Алматы мектептерінің Bilim Class платформасына көшуіне қатысты сұрақтарға жауап берді, деп хабарлайды CMN.KZ
Министрдің айтуынша, каникул кезеңінде ведомство жергілікті атқарушы органдарға оқу жылының соңына дейін LMS-жүйелерді ауыстырмауды ұсынған. Алайда «Білім туралы» заң әкімдіктерге шешім қабылдауда автономия береді – платформаны таңдау жауапкершілігі де соларға жүктелген.
Қазіргі кезеңде, Сүлейменованың сөзінше, жүйелерді ауыстыру процесі тоқтатылған. Оқу жылы аяқталғанға дейін министрлік Жасанды интеллект және цифрлық даму министрлігімен бірлесіп LMS-платформаларға қойылатын талаптарды, әсіресе балалардың дербес деректерін қорғау және қауіпсіздік бөлігінде, қатаңдатуды жоспарлап отыр.
«Біздің жоспарымыз – LMS-жүйелердің жергілікті атқарушы органдар деңгейінде емес, мемлекеттік деңгейде болуы. Бұл мәселе қазір пысықталып жатыр», – деп түсіндірді министр.
Оқу-ағарту министрі қағаз күнделіктерге қайта оралу мәселесіне де жеке тоқталды. Оның айтуынша, бұл – талқылауды қажет ететін тақырып. Смартфондар мен электронды сервистер кеңінен қолданылатын цифрлық заманда қағаз және электронды форматты қатар жүргізу оқу процесіне қатысушыларға қосымша жүктеме түсіреді.
Министр жүйе біреу ғана болуы керек екенін атап өтті – ол мұғалімдерге, оқушыларға және ата-аналарға түсінікті әрі ыңғайлы болуы тиіс. Сонымен қатар ведомство қолданыстағы платформалардың ешқайсысына басымдық бермейтінін жеткізді: бүгінде Қазақстанда төрт LMS-жүйе қолданылады.
«Негізгі қағида – қисындылық пен тұрақтылық. Егер оқу жылы бір платформада басталса, оны сол жүйеде аяқтаған дұрыс. Бұл балалар мен педагогтар үшін қосымша стресс туғызбауы тиіс», – деп қорытындылады Жұлдыз Сүлейменова.
CMN.KZ ресми Telegram арнасына жазылыңыз
