Өскеменде қалың түтін мен ауаның ластануы салдарынан 28-29 қараша күндері мектеп оқушылары онлайн форматқа көшті, деп хабарлайды CMN.KZ.
Бұл шешімді қалалық білім беру бөлімі қабылдады.
23 қарашадан бастап қалада ауа райының қолайсыздығы байқалып, «температуралық инверсия» деп аталатын метеорологиялық құбылыс тіркелді. Бұл кезде жылы ауа қабаты суық ауаны жауып, ластаушы заттардың атмосферада жиналуына мүмкіндік береді. Өскеменнің тау бөктерінде орналасуы мен жеке үйлердің пешпен жылытылуы да жағдайды күрделендіреді.
27 қарашада экология департаментінің мамандары қаланың әртүрлі аймақтарында ауаның сапасын тексеру жүргізді. Алғашқы мәліметтер бойынша, ауаның құрамындағы шаң-тозаң мен күйенің концентрациясы рұқсат етілген шектен асып кеткен. Бұл деректер «Қазгидромет» зерттеулерімен расталды. Сондай-ақ, көміртек оксиді, PM2.5 және күкірт диоксидінің де орташа тәуліктік мөлшері нормадан жоғары болған.
