Наурыздағы ҰБТ басталды: 184 мың талапкер өтініш берген

Биыл тестілеуге қызығушылық артқан.

Мәліметінше, ҰБТ-ға қатысу үшін шамамен 184 мың адам өтініш берген. Бұл өткен жылмен салыстырғанда 20 мыңға көп.

Талапкерлердің 74,4%-ы тестті қазақ тілінде, 25,5%-ы орыс тілінде, ал 216 адам ағылшын тілінде тапсыруды таңдаған.

Қатысушылар тестілеу күнін, уақытын және өткізу пунктін өздері таңдады.

Қандай пәндер жиі таңдалады?

Ең танымал бейіндік пәндер комбинациясы – «Математика–Физика» (18,7%). Бұл болашақ инженерлер, құрылысшылар, энергетиктер, техник мамандар мен мұғалімдердің таңдауы.

Екінші орында – «Биология–Химия» (16,6%). Бұл комбинацияны медицина саласына түсуді жоспарлаған талапкерлер жиі таңдайды.

Үшінші орында – «Шығармашылық емтихан» (10,3%).

Тестілеу кезінде қатысушылар кіріктірілген калькуляторды, химиялық элементтердің периодтық жүйесін (Менделеев кестесі) және тұздардың ерігіштік кестесін пайдалана алады.

2026 жылғы формат өзгерген жоқ

Ғылым және жоғары білім министрлігі емтихан құрылымы бұрынғыдай қалғанын атап өтті.

Талапкерлер үш міндетті пән және екі бейіндік пән тапсырады. Барлығы – 120 тапсырма:

• 20 сұрақ – Қазақстан тарихы;

• 10 сұрақ – оқу сауаттылығы;

• 10 сұрақ – математикалық сауаттылық;

• әр бейіндік пән бойынша 40 сұрақтан.

Ең жоғары балл – 140. Тестілеу уақыты – 4 сағат (240 минут). Ерекше білім беру қажеттіліктері бар балаларға қосымша 40 минут беріледі.

Наурыздағы ҰБТ-ны кімдер тапсырады?

Тестілеуге:

• шартты түрде ақылы бөлімге қабылданған студенттер;

• өткен жылдардың және колледж түлектері;

• Қазақстан азаматы емес қазақ ұлтының өкілдері;

• шетелде оқыған ҚР азаматтары;

• ақылы негізде түсуге ниетті мектеп бітірушілер қатысады.

Апелляцияны тест аяқталғаннан кейін 30 минут ішінде беруге болады. Сертификат комиссия шешімінен кейін жеке кабинетте жарияланады.