Қазақстанның қылмыстық-атқару жүйесінің комитеті экс-министр Арыстанбек Мұхамедиұлының жаза мерзімі туралы қате ақпарат бергені анықталды. CMN.KZ редакциясы жолдаған ресми сауалға жауап ретінде комитет Мұхамедиұлының жаза мерзімі 2029 жылы аяқталатынын хабарлаған еді. Алайда, кейін бұл ақпараттың техникалық қателік екені белгілі болды.
Бастапқыда комитет Мұхамедиұлының жазасын 2024 жылдың 21 тамызынан бастап есептеп, 2029 жылдың 27 мамырында аяқталады деп көрсеткен. Алайда, ақпараттың қалай есептелгені туралы нақты түсіндірме берген жоқ. Қайталап жолданған сауалға жауап бергенде, Ақмола облысының ҚАЖД техникалық қателік жібергенін мәлімдеді.
«ҚАЖ департаменті сотталушының жаза мерзімінің аяқталу күні туралы қате ақпарат берген. Жауап жобасын дайындау барысында техникалық қателік орын алған. Алайда, біз Мұхамедиұлының жаза мерзімінің нақты аяқталу мерзімін, яғни тергеу изоляторында өткізген уақыты ескеріле отырып, 2032 жылдың сәуірінде аяқталатынын хабарлаймыз», — делінген ресми жауапта.
CMN.KZ-тің есептеулері дұрыс шықты — Мұхамедиұлының жазасын 2022 жылдың 26 мамырынан бастап есептеу қажет болған. Сол күні ол алғаш рет Астанадағы Ұлттық музей директоры қызметінде жүрген кезде бюджет қаржысын ұрлағаны үшін қамауға алынған еді.
Алғашқы сот үкімі 2023 жылдың 20 маусымында шығарылды. Сол кезде тергеу изоляторында өткізген уақыты бір жарым күнге тең есептелген. Бұл есеп 2024 жылдың 21 тамызына дейін, яғни негізгі мерзімнің басталуына дейін жарамды болды. Мұхамедиұлы бұл аралықта 1218 күн, яғни үш жыл және төрт ай қамауда болды.
Енді экс-министр 21 тамыздан кейін қалған жаза мерзімін, яғни жеті жыл сегіз айды өтеуі тиіс. Осылайша, Мұхамедиұлы 2032 жылдың сәуірінде босатылуы керек.
2023 жылдың 20 маусымында Астананың қылмыстық істер жөніндегі ауданаралық соты оны бюджет қаржысын ұрлағаны үшін кінәлі деп танып, сегіз жылға бас бостандығынан айырды.
Ал 2024 жылдың 13 ақпанында оны ірі көлемде пара беруге оқталғаны үшін 11 жылға бас бостандығынан айырды. Осы уақытта оның әйелі Ғалия Искақова мен адвокаты Мұстахим Төлеев те сот алдында жауап берді. Искақова желтоқсан айында күйеуінің адвокатына 120 мың доллар беріп, оны Мұхамедиұлының қамаудан шығуы үшін және «Дипломат» қонақ үйін өзінде қалдыру мақсатында жоғары лауазымды тұлғаларға бермек болған. Искақоваға алты ай, ал адвокатқа алты жыл сегіз ай бас бостандығынан айыру жазасы тағайындалды.
Алайда, Мұхамедиұлына қатысты сот процестері осымен аяқталған жоқ. 2024 жылдың ақпан айының соңында Астана соты «Дипломат» қонақ үйін рейдерлік басып алу және бюджет қаржысын ұрлау ісі бойынша жаңа үкім шығарды. Алайда, жаза мерзімі өзгеріссіз қалып, 11 жыл бас бостандығынан айыру жазасы қалдырылды.
Бұрынғы министр не істеп жүр?
Бұрын CMN.KZ редакциясы бұрынғы министрлер Арыстанбек Мұхамедиұлының абақтыдағы іс-әрекеттері туралы ақпарат алған болатын.
