Қазақстан Конституциясында Халық кеңесін азаматтардың мүддесін білдіретін және заңнамалық бастама құқығына ие дербес жоғары консультативтік орган ретінде бекіту ұсынылды. Бұл туралы Конституциялық комиссия отырысында Конституциялық сот төрағасының орынбасары Бақыт Нұрмұханов мәлімдеді, деп хабарлайды CMN.KZ
Оның айтуынша, Халық кеңесіне қатысты нормалар Конституцияның жеке бөлімінде шоғырландырылған. Бұл оның мемлекеттік билік жүйесіндегі ерекше мәртебесін айқындайды.
«Жаңа жоғары консультативтік орган Қазақстан халқының мүддесін білдіретіні және заңнамалық бастама құқығына ие болатыны бекітіледі», – деп түсіндірді Нұрмұханов.
Сонымен қатар Конституция жобасына бұрын салалық конституциялық заңда бекітілген Конституциялық соттың құқықтық мәртебесіне қатысты нормалар енгізілген. Онда Конституциялық соттың бүкіл ел аумағында Ата заңның үстемдігін қамтамасыз ететін, конституциялық бақылау жүзеге асыратын тәуелсіз мемлекеттік орган ретіндегі мәртебесін тікелей бекіту ұсынылады.
Бұдан бөлек, түзетулерді әзірлеу аясында Парламенттің өкілеттіктеріне ауқымды ревизия жүргізілген. «Президент» бөлімі де елеулі түрде қайта қаралған. Атап айтқанда, мемлекет басшысының Құрылтаймен, Үкіметпен және өзге де мемлекеттік органдармен өзара іс-қимылы, кадрлық шешімдер қабылдау және нормашығармашылық мәселелері нақтыланған.
Жаңашылдықтардың бірі вице-президент институтына қатысты. Конституцияға оның құқықтық мәртебесі мен өкілеттіктерін айқындайтын жаңа бап енгізілді.
«Бөлімге вице-президенттің құқықтық мәртебесі мен өкілеттіктеріне арналған жаңа бап енгізілді», – деді Конституциялық сот төрағасының орынбасары.
Бірпалаталы Парламент моделіне көшу жағдайында «Құрылтай» бөліміне де өзгерістер пакеті дайындалған. Онда екіпалаталы жүйеге қатысты нормалар алынып тасталып, заң шығарушы органның жұмысын ұйымдастыруға байланысты ережелер қайта қаралған.
Нұрмұхановтың айтуынша, Құрылтай сессиялары туралы баптар жаңартылып, заңнамалық бастама құқығы бар субъектілердің тізімі кеңейтілген. Сондай-ақ Құрылтай қабылдайтын заңдармен реттелуге тиіс негізгі қоғамдық қатынастардың тізбесі толықтырылған.
CMN.KZ ресми Telegram арнасына жазылыңыз
