Қазақстанда әлеуметтік желілерді шектеу және онлайн-платформаларға арналған жаңа ережелер талқыланып жатыр. Билік медиазаңнаманы жаңартуды жоспарлауда: жасөспірімдердің әлеуметтік желілерге қолжетімділігінен бастап, интернеттегі жарнамалық табыстарды бөлу мәселесіне дейін. Тиісті түзетулер қоғамдық талқылауға шығарылды, деп хабарлайды CMN.KZ
Мәдениет және ақпарат министрі Аида Балаева Үкімет отырысында ведомство әзірлеп жатқан ақпарат және масс-медиа саласындағы өзгерістер топтамасы туралы айтты.
Оның сөзінше, БАҚ туралы заңнаманы жаңарту жұмысы жалғасады, ал ең өзекті мәселелердің бірі – цифрлық ортада балалар мен жасөспірімдерді қорғау.
«Балалар мен жасөспірімдердің әлеуметтік желілерге қолжетімділігін шектеу мәселесі қарастырылып жатыр», – деді Аида Балаева.
Мәдениет және ақпарат министрлігі онлайн-платформалар мен масс-медианың қызметіне қатысты да түзетулер дайындаған. Министрдің айтуынша, бұл құжаттар сараптамадан өтіп, қоғамдық талқылауға ұсынылған.
Жаңа нормаларды іс жүзінде іске асыру үшін билік пайдаланушылардың жасын тексеру тетіктерін әзірлеуді көздеп отыр. Бұл жұмыс Оқу-ағарту министрлігімен және Жасанды интеллект және цифрлық даму министрлігімен бірлесіп жүргізіледі. Қажет болған жағдайда жауапкершілік шаралары да қарастырылмақ.
Сонымен қатар заңнамалық деңгейде онлайн-платформалар мен бұқаралық ақпарат құралдары арасындағы жарнамалық табыстарды бөлу тәртібін реттеу мәселесі талқылануда. Кейбір тауарларға қатысты жарнамаға қойылған тыйымды ішінара алып тастау мүмкіндігі де қарастырылып отыр.
Министрлікте атап өткендей, өзгерістердің басты мақсаты – медиасаланы цифрлық шындыққа бейімдеу, сонымен қатар кәмелетке толмағандарды қорғауды және отандық БАҚ-тың мүддесін күшейту.
CMN.KZ ресми Telegram арнасына жазылыңыз
