Әлеуметтік желілерде вакцинация тақырыбы қайтадан қызу талқылануда. Бұл жолы Қазақстанға балаларға ауру тудыруы мүмкін «арзан вакциналар» сатып алынып жатыр деген мәлімдемелер тарады. Денсаулық сақтау министрлігі бұл ақпараттың шындыққа жанаспайтынын және ғылыми негізі жоқ екенін мәлімдеді, деп хабарлайды CMN.KZ
Қауесеттердің таралуына подкасттардың бірінде жарияланған сұхбат себеп болған. Мұндай мәлімдемелер ата-аналарды жаңылыстырып, денсаулық сақтау жүйесіне деген сенімді әлсірететінін атап өтті.
Министрлікте Қазақстанда Ұлттық профилактикалық егу күнтізбесі аясында қолданылатын барлық вакциналар көпсатылы халықаралық және ұлттық сараптамадан өтетінін еске салды.
«Қазақстан Республикасында қолданылатын барлық вакциналар Дүниежүзілік денсаулық сақтау ұйымының талаптарына және ұлттық заңнамаға сәйкес тіркеліп, қолдануға рұқсат алған», – делінген ведомство хабарламасында.
Министрлік өкілдерінің айтуынша, вакциналарды сатып алу бағасына емес, тек сапасы, қауіпсіздігі және тиімділігіне қарай жүзеге асырылады. Бұл ретте ДДСҰ преквалификациясы немесе қатаң реттеуі бар елдерде тіркелуі, клиникалық зерттеулердің нәтижелері, GMP стандарттарына сәйкестігі және тіркеуден кейінгі мониторинг деректері ескеріледі.
«Вакциналарды сатып алу “арзандық” қағидатына емес, тек сапа, қауіпсіздік және тиімділік көрсеткіштеріне негізделеді», – деп нақтылады министрлік.
Балаларда ауру тудырады деген айыптауларға қатысты ведомство жеке тоқталды.
«Вакциналар балаларда ауру туғызады деген тұжырымдар ғылыми дәлелдерге негізделмеген және көпжылдық халықаралық бақылаулар деректеріне қайшы келеді», – деп мәлімдеді денсаулық сақтау министрлігі.
Дәлел ретінде министрлік статистиканы келтірді: соңғы онжылдықтарда Қазақстанда эпидемиялық паротитпен сырқаттану 100 еседен астам, А вирусты гепатит – 32 есе, В гепатит – 92 есе төмендеген. Балалар арасындағы қызылша көрсеткіші 90%-дан астам азайған, ал полиомиелит жағдайлары 1996 жылдан бері тіркелмеген.
Сондай-ақ елде фармакологиялық қадағалау жүйесі жұмыс істейді: вакцинациядан кейінгі кез келген жағымсыз реакция мамандар тарапынан талданып, қауіп анықталған жағдайда жедел шаралар қабылданады.
Министрлік қазақстандықтарды ресми дереккөздерге және дәрігерлердің ұсынымдарына сүйенуге шақырып, вакцинация туралы жалған ақпараттың таралуы балалардың денсаулығына нақты қауіп төндіруі мүмкін екенін ескертті.
CMN.KZ ресми Telegram арнасына жазылыңыз
