Давоста Бейбітшілік кеңесінің жарғысына қол қою кезінде Қазақстан президенті Қасым-Жомарт Тоқаев пен АҚШ президенті Дональд Трамптың қысқаша әңгімесі видеоға түсіп қалды, деп хабарлайды CMN.KZ
Ақорданың ресми Telegram-арнасында жарияланған бейнероликтен Қасым-Жомарт Тоқаевтың Дональд Трампқа бір нәрсені түсіндіріп тұрғанын, ал америкалық көшбасшының қысқа жауап қайтарғанын көруге болады. Алайда олардың не туралы сөйлескені бейнеде естілмейді.
Кейінірек әңгіме мазмұнын Қазақстан президентінің баспасөз хатшысы Руслан Желдібай жария етті.
«Президент Қасым-Жомарт Тоқаев америкалық көшбасшының назарын Давос форумында таратылған “Президент Дональд Трамптың 365 күн ішіндегі 365 жеңісі” атты ресми құжатта 177-жеңіс ретінде Қазақстанның Авраам келісімдеріне қосылғаны көрсетілгеніне аударды. Сондай-ақ президент Қасым-Жомарт Тоқаев Дональд Трампқа “салауатты ақыл-ойға негізделген” ішкі саясатты жүзеге асыруда табыс тіледі», – деп жазды Желдібай өзінің Telegram-арнасында.
Өз кезегінде Дональд Трамп Тоқаевқа Бейбітшілік кеңесін құру бастамасын қолдағаны үшін алғысын білдірді.
CMN.KZ ресми Telegram арнасына жазылыңыз
