Алматы қаласының тұрғыны Мадина 2025 жылдың 25 тамызында, жүктілігінің 31-аптасында ауыр асқынуларға тап болғанын айтты. Ол жуырда ғана жүктілік және босану демалысына шыққан, перзентханаға сөмкесін де жинап үлгермеген, үшінші сәбиін қай жерде дүниеге әкелетінін ойластырып жүрген. Көптен күткен қызын күтіп жүрген Мадина өзін бақытты сезінген. Алайда кейін жағдайы күрт нашарлаған, деп хабарлайды CMN.KZ
Кенеттен оның ішінің оң жағы, кіндік тұсы қатты ауыра бастаған. Күйеуі оны Алматы қаласындағы № 7 қалалық ауруханаға жеткізген. Әйелдің айтуынша, ауруханадан екі рет хирургтер келіп, бұл олардың мәселесі емес екенін айтқан. Перинаталдық орталықтың гинеколог дәрігерлері де нақты диагноз қоймай, науқас ауырсынуды «ойдан шығарып отыр» дегендей пікір білдірген.
2 қыркүйек күні түстен кейін Мадинаға ауырсынуды басатын дәрі беріп, іштің не себепті ауырып тұрғанын түсіндірместен үйіне жіберген. 3 қыркүйекте ауырсыну күшейіп, әйел есінен танып қала бастаған. 3 қыркүйектен 4-іне қараған түні ол бірнеше рет жедел жәрдем шақырып, қайтадан № 7 аурухана мен перинаталдық орталық арасында тасымалданған.
Ауырсынудың себебі анықталмаған соң, Мадина «ЭмирМед» клиникасына жүгінген. Онда оған преэклампсия диагнозы қойылып, шұғыл түрде перзентханаға жатқызу қажет екені айтылған. Әйел қайтадан жедел жәрдем шақырып, перинаталдық орталыққа барған. Онда оған МРТ жасалған. Кейін № 7 ауруханаға ауыстырылған. Сол сәтте Мадина есін әрең біліп жатқан.
Операциядан кейін ол жансақтау бөлімінде оянған. Жүкті күйінде, бірақ ішінің ортасында үлкен тілік ізі бар және іш қабырғасына шығарылған жіңішке ішек (стома) қойылған күйде жатқан.
Медициналық анықтамада мынадай диагноз көрсетілген:
«Гангренозды-перфоративті дивертикулит. Перидивертикулярлы инфильтраттың іріңдеуі және іш қуысына жарылуы. Іріңді оментит. Диффузды іріңді перитонит. Лапаротомиядан кейінгі жағдай, іш қуысы ағзаларын тексеру, үлкен шарбының бір бөлігін және Меккель дивертикулы бар жіңішке ішек бөлігін резекциялау, соңғы илеостоманы шығару, іш қуысын санациялау және дренаждау».
Мадинаның айтуынша, оның ішегінің бір бөлігі қабынып, жарылып кеткен. 10 күн бойы дәрігерлер нақты шара қолданбаған, ал оның жағдайы күннен-күнге нашарлаған. Ауруханада оған қан құйылған.
13 қыркүйекте, ішіне стома қойылған және үлкен тілік ізімен, Мадина жүктіліктің 33-аптасында қызын дүниеге әкелген. Босану кезінде дәрігерлер жатырды алып тастау немесе вакуум-экстракция қолдану мүмкін екенін ескерткен.
Босанғаннан кейін сәби бір ай перинаталдық орталықта болған, ал Мадина қалалық ауруханада ем алған. Үш ай бойы илеостомамен жүру оның өмірін айтарлықтай қиындатқан. 2025 жылдың 3 желтоқсанында оған екінші операция жасалған. Алайда жіңішке ішектің терминалды бөлігі мен илеоцекальды қақпақты сақтап қалу мүмкін болмаған. Қалған жіңішке ішек тікелей тоқ ішекке жалғанған.
Ас қорыту жүйесіндегі өзгерістерге байланысты Мадина күніне бірнеше рет дәретханаға баруға мәжбүр, өзін әлсіз сезінеді. Тағамның жылдам өтуі және өттің көбеюі ішек шырышты қабатын тітіркендіреді. Осы себепті ол қызын емізе алмаған және нәрестеге толыққанды күтім жасай алмаған.
Екінші операция үшін Мадинаға тігу аппараты қажет болып, оны өзі басқа өңірдегі медициналық қоймадан тапсырыс беріп алдырған. Сондай-ақ бір миллион теңгеден астам сомаға дәрі-дәрмек сатып алған. Әйел ағзасының қатты зардап шеккенін және қалпына келу үшін көп күш қажет екенін айтады.
«Айқайлағым келеді, жылаймын, неге бұлай болғанын түсінбеймін. Уақытында есепке тұрдым, жүктілігім жақсы өтіп жатқан. Бұл менің үшінші босануым еді, бәрі мінсіз болуы керек еді. Сақтауға алғаш рет жаттым. Қалайша құрсағында тағы бір жанды көтеріп жүрген әйелге осылай салғырт қарауға болады? Осындай жағдайға тап болғандар болса, тұрмысымды қалыпқа келтіріп, қоғамға қайта оралуыма көмектесіңіздерші», – деп жазды ол.
CMN.KZ ресми Telegram арнасына жазылыңыз
