Дағыстанда соңғы жүз жылдағы ең күшті су тасқыны жалғасуда

Көпірлер мен өткелдер қирап, мыңдаған адам жарық пен сусыз қалған. Кейбір аймақтарда сел мен көшкіндер тіркелген.

Дағыстанда билік дүйсенбіге дейін жоғары дайындық режимін енгізді. Рекордтық жауын-шашын Махачкала, Дербент қалаларында, сондай-ақ Ахты, Куппа, Касумкент, Избербаш, Кумух, Дағыстан Оттары және басқа да елді мекендерде тіркелген.

Тұрғындар үйлер мен көшелердің су астында қалғанын айтып жатыр. Мыңдаған адам электр қуатынсыз отыр.

Шешенстанда да жағдай күрделі. Беной-Ведено ауылында жолды су шайып кеткен, салдарынан тұрғындар сыртпен байланыссыз қалған. Балансу ауылында Ножай-Юрт трассасының бөліктері бұзылған. Бірқатар елді мекенде көшкіндер тіркелді.

Ал Автуры ауылындағы негізгі көпір толық қираған – бетон құрылымды қатты су ағыны алып кеткен.

Су тасқыны Ингушетияға да жетті. Нөсер жаңбыр салдарынан аймақта электр энергиясы мен су беру жүйесінде іркілістер байқалуда.