Астанада апелляциялық сот алқасы Людмила Грачёваға қатысты қылмыстық істі қайта қарады. Ол Қуандық Бишімбаевқа қатысты үкімді жеңілдетуге уәде беріп, осы үшін 100 млн теңге сұрағаны үшін сотталған болатын, деп хабарлайды CMN.KZ.
Грачёва алаяқтық жасауға оқталғаны және аса ірі көлемде пара беруге итермелегені үшін 10 жылға бас бостандығынан айырылған еді. Тергеу дерегінше, ол Бишімбаевтың анасынан ақшаны апелляциялық соттың судьяларына беру үшін талап еткен.
Апелляциялық сот алғашқы үкімді күшінде қалдырды.
«Қылмыстық істі қарау барысында заң бұзушылық анықталған жоқ. Барлық сот процедуралары заңға сәйкес жүргізілді. Сот шешімін қабылдау кезінде қатысқан судьялар мен алқабилердің пікірі ескерілді», – деп мәлімдеді сот өкілдері.
Грачёва сот үкіміне келіспей, апелляциялық шағым түсіргенімен, нәтиже өзгеріссіз қалды. Енді оның сотталғаны туралы актілер заңды күшіне енді.
Еске сала кетсек, Бишімбаевтың туыстары 2023 жылы маусымда полицияға шағым түсіріп, Грачёва олардың сеніміне кіріп, 100 млн теңге талап еткенін айтқан болатын. Бұл жағдай экс-министр Қуандық Бишімбаевқа қатысты қылмыстық іспен қатар жүріп жатыр.
Бишімбаев биыл 13 мамырда ауыр қылмыстары үшін 24 жылға бас бостандығынан айырылды. Оның жұбайы Салтанат Нүкенованы азаптап, өлтіргені үшін айыпталған экс-министр қатаң режимдегі колонияға жіберілді. Ал оның туысы Байжанов аса ауыр қылмысты жасырып қалғаны үшін 4 жылға сотталды.
