Жоғары оқу орындарында жасанды интеллектті енгізу, ұлттық тестілеу жүйесін қайта құру және студенттердің ондаған мың ИИ-жобасы. Ғылым және жоғары білім министрі Саясат Нұрбек 2026 жылы Қазақстан білім беру жүйесінде қандай цифрлық өзгерістер болатынын айтты, деп хабарлайды CMN.KZ
6 қаңтарда Үкімет отырысында сөз сөйлеген министр 2025 жылы Қазақстанның Google, NVIDIA, Coursera, Huawei, OpenAI, ETS және басқа да ірі халықаралық технологиялық серіктестермен ынтымақтастығын жалғастырғанын еске салды.
Оның айтуынша, биыл бұл серіктестік жаңа деңгейге шығады. OpenAI-мен бірлесіп, жасанды интеллектті тікелей оқу үдерісіне енгізуге бағытталған жоба іске қосылады. Ал ETS-пен бірге ұлттық тестілеу жүйесін реформалау жобасы басталады.
«2026 жылы OpenAI-мен бірлесіп оқытушыларға арналған оқу үдерістеріне жасанды интеллектті енгізу жобасы, ал ETS-пен ұлттық тестілеу жүйесін реформалау жобасы іске қосылады», – деді министр.
Министр Мемлекет басшысының тапсырмасымен жүзеге асырылып жатқан AI-Sana бағдарламасына да тоқталды. Бағдарламаның алғашқы кезеңінде студенттер ИИ-дағдылары бойынша 646 мың сертификат алған.
Алдағы кезеңдер одан да ауқымды:
-
Екінші кезеңде 100 мың студент жасанды интеллект бойынша тереңдетілген курстардан өтеді. Курстарды ИИ жөніндегі кеңес мүшесі Пол Ким әзірлеген (іріктеу ақпан айында басталады);
-
Үшінші кезеңде 60 мың студент индустрияның нақты сұраныстарына сай өз ИИ-жобаларын әзірлейді;
-
Төртінші кезеңде ең үздік 1 500 жоба акселерациядан өтіп, нарыққа шығарылады.
Саясат Нұрбектің айтуынша, қазірдің өзінде студенттер жасанды интеллект негізінде 229 шешім әзірлеген, ал бағдарлама кеңейген сайын бұл көрсеткіш өсе береді.
CMN.KZ ресми Telegram арнасына жазылыңыз
