Көршілерінің айтуынша, отбасы тыныш өмір сүрген, еш күдік тудырмаған. Зейнет жасындағы ерлі-зайыпты зейнетақысы мен өз еңбегінің есебінен күн көрген, олардың екі баласы да мүгедектігі бар жандар болған. Айналасындағылар ешқандай күмәнді жайтты байқамаған – отбасының жоғалғаны туыстары құқық қорғау органдарына жүгінгеннен кейін ғана белгілі болды.
6 қаңтарда полицейлер ерлі-зайыптының мәйіттерін тапты. Алдын ала мәлімет бойынша, олар үйдің жанындағы шаруашылық құрылыстан, жоғалғаннан кейін шамамен екі ай өткен соң анықталған. Зейнеткерлердің екі баласы әлі күнге дейін хабар-ошарсыз кеткендер қатарында.
Іздеу шаралары Шәдіман-түбек, Бесмола, Бірмола аумақтарында және Қарасу маңында жүргізілуде. Операцияға құтқарушылар, сүңгуірлер және арнайы суасты дроны тартылған.
Журналистердің анықтауынша, 5 қараша күні ерлі-зайыптылардың бөлек тұратын тағы бір қызы үйден таксимен шығып кеткен. Кейін бейнебақылау камералары оны Индер ауданындағы жанармай құю бекеттерінің бірінде тіркеген. Ал жоғалған отбасының екінші қызы күйеуімен бірге Қазақстаннан тысқары – Өзбекстанға кеткен.
Сонымен қатар, отбасы басшысының ұялы телефоны анда-санда белсенділік көрсетіп тұр, алайда әзірге бұл нөмір арқылы байланыс орнату мүмкін болмады.
Белгілі болғандай, отбасы өткен жылдың қазан айында жоғалып кеткен, ал туыстары оларды іздеу туралы арызды 25 желтоқсанда берген. Қазіргі уақытта тергеу органдары «Адам өлтіру» бабы бойынша қылмыстық іс қозғады. Тергеу жалғасып жатыр.
CMN.KZ ресми Telegram арнасына жазылыңыз
