Маңғыстау облысындағы «Бейнеу» полигонында жоспарлы далалық атыс жаттығулары кезінде мерзімді әскери қызметші қаза тапты, деп хабарлайды CMN.KZ.
ҚР Қарулы күштері Құрлық әскерлерінің мәліметінше, сарбаз қарумен жұмыс істеу барысында өлімге әкелген оқ жарақатын алған.
«Аталған факті бойынша Батыс өңірінің әскери-тергеу органдары қылмыстық іс қозғады. Оқиғаның себептері мен мән-жайы анықталуда», – деп хабарлады ведомство.
Сондай-ақ Қорғаныс министрінің тапсырмасымен полигонға арнайы комиссия жіберілгені айтылды. Комиссияны қорғаныс министрінің орынбасары, генерал-майор Шайх-Хасан Жазықбаев басқарады.
Бас прокуратура да Ақтау гарнизонының әскери бөлімдерінің бірінде мерзімді қызметші сарбаздың қаза болуына байланысты сотқа дейінгі тергеу басталғанын растады.
«Оқиға орнына Қорғаныс министрінің орынбасары, Бас әскери прокурор және ІІМ Әскери-тергеу департаментінің бастығы барды. Қажетті тергеу-жедел шаралары жүргізіліп, сараптамалар тағайындалды», – деп мәлімдеді Бас прокуратура.
Олар өкілдері іс бойынша процессуалдық прокурор айқындалғанын және тергеу барысы бақылауға алынғанын атап өтті. ҚР Қылмыстық-процестік кодексінің 201-бабына сәйкес сотқа дейінгі тергеу деректері жария етілмейді.
CMN.KZ ресми Telegram арнасына жазылыңыз
