2026 жылдың 1 қаңтарынан бастап Қазақстанда көлік құралдарына салынатын салықтың жаңа ережелері күшіне енеді. Өзгерістер жаңартылған Салық кодексінде қарастырылған және олар қарапайым автокөлік иелеріне де, фермерлерге де қатысты болады, деп хабарлайды CMN.KZ
Негізгі өзгерістер
Басты жаңашылдық автокөліктің жасына байланысты.
-
Пайдалану мерзімі 10 жылдан 20 жылға дейінгі жеңіл автокөліктер үшін 0,7 төмендету коэффициентіенгізіледі;
-
20 жылдан асқан көліктерге 0,5 коэффициент қолданылады.
Бұл ескі автокөлік иелері азырақ салық төлейді дегенді білдіреді. Айта кетейік, 2026 жылға арналған салық 2027 жылы төленеді, себебі ол жылдың қорытындысы бойынша есептеледі.
Тағы бір маңызды өзгеріс – қозғалтқыш көлемі 3000 текше сантиметрден асатын жеңіл автокөліктерге арналған жекелеген мөлшерлемелердің жойылуы. Бұл норма Қазақстанда өндірілген немесе 2013 жылғы 31 желтоқсаннан кейін елге әкелінген көліктерге қатысты.
Фермерлер үшін жеңілдік
Шаруа және фермер қожалықтары үшін де жағымды жаңалық бар. Енді олар басқа жеңілдіктерге қосымша ретінде бір пикап үшін көлік салығын төлемейді. Бұл – жүк платформасы бар және кабинасы қатты қалқамен бөлінген жеңіл автокөлік.
Көлікті жіктеу жеңілдетілді
Заң шығарушылар көлік құралдарын жіктеуді де оңайлатты. Салық кодексінен автокөліктерді кузов түріне қарай (пикап, джип, лимузин, фургон) бөлу нормасы алынып тасталды. Енді көліктің санаты тіркеу куәлігінде көрсетілген деректерге және жүргізу құқығына (A, B, C немесе D) қарай анықталады.
Есептілік азаяды
Сонымен қатар салықтық есептілік те қысқарды. 2026 жылдан бастап автокөлік иелері көлік салығы бойынша ағымдағы төлемдер есебін тапсырмайды. Салық төлеуші тек жылдық декларацияны өткізіп, салықты жылына бір рет төлейтін болады.
CMN.KZ ресми Telegram арнасына жазылыңыз
