Қазақстан президенті Қасым-Жомарт Тоқаев АҚШ-тағы президенттік сайлауда айқын жеңіске жеткен Дональд Трампты құттықтап, шын жүректен жылы лебізін білдірді.
Бұл туралы CMN.KZ хабарлайды.
Мемлекет басшысы екі ел арасындағы ынтымақтастықтың әрі қарай нығаятынына сенім артып, өзара қауіпсіздік, ядролық қаруды таратпау және инвестиция салаларындағы бірлескен қадамдардың жалғасатынын атап өтті. Тоқаевтың пікірінше, осы салаларда қол жеткізілген табыстар қос мемлекетке де зор пайда әкелмек.
«Қазақстан Президенті Дональд Трампқа америкалық халықтың гүлденуі жолында қажырлы еңбек пен табысты қызмет тіледі. Ол Трамптың халықаралық тұрақтылық пен қауіпсіздікті қамтамасыз етуде маңызды рөл атқаратынына сенім білдірді», — делінген Ақорданың хабарламасында.
Айта кету керек, бұған дейін Дональд Трамп өз жеңісін жариялаған болатын. Ал оның бәсекелесі Камала Харрис Вашингтондағы Говард университетінде сөз сөйлеуден бас тартты.
