Талғар ауданының тұрғындары «Хуторлық» қылмыстық тобына қатысы бар деген Хасан Қасымбаев 2 қараша күні қолға түсті. Бұл туралы Алматы облысының полиция департаментінің баспасөз қызметі хабарлады, деп жазады CMN.KZ.
Полиция департаментінің мәліметінше, 2021 жылдың маусым айында ауыр дене жарақатын салу және адам ұрлау күдігімен бес адам тұтқындалған болатын. Тергеу амалдары аяқталып, айыптылар сот үкімінен кейін жазаларын темір тордың ар жағында өтеп жатыр.
Хасан Қасымбаевқа осы қылмыстық іске қатысы бар деген күдік түсіп отыр. Қазіргі уақытта құқық қорғау органдары барлық жағдайды жан-жақты, толық және әділ зерттеуге бағытталған тергеу әрекеттерін жүргізуде.
Істің материалдары сотқа жолданды, онда бұлтартпау шарасын қолдану туралы мәселе қаралуда.
Айта кетсек, бұған дейін Хасан Қасымбаевқа Талғар өңірінде аты шулы «Хуторлық» ұйымдасқан қылмыстық топтың белсенді мүшесі ретінде қатысы бар деген ақпарат тарады. Бұл топтың мүшелері, кейбір мәліметтерге сүйенсек, Шерзат Полатты қасақана өлтірді деп күдіктелген еді. Алайда Қасымбаев өзіне қатысты тарап жатқан ақпараттың жалған екендігін айтып, бұл әрекеттерін «ар-намыс пен беделіме қарсы жасалған қастандық» деп бағалады. Өзін қорғау үшін ол адвокат жалдап, осы мәселені заңды жолмен шешуге бекінген.
Сондай-ақ, ол жалған ақпараттың тарауы отбасының тыныштығын бұзып, көптеген қиындықтар әкелгенін де жеткізген болатын.
Осыған қоса, күдіктінің ағасы Аслан Қасымбаев сол күні Талғар ауданы әкімінің аппараты басшысы қызметінен босатылды.
Еске салайық, Талғар өңірінде 16 жастағы Шерзат Болат әкесінің дүкенінде орын алған жанжал барысында қаза тапты. Куәгерлердің айтуынша, бұзақылық әрекеттерімен танылған сатып алушылар арасында «Хуторлық» мүшелері де болуы мүмкін.
Сенбі күні қаза болған жігіттің ата-анасының үйі отқа оранып, толығымен жанып кеткендігі мәлім болды. Құқық қорғаушылар бұл оқиғаны әдейі ұйымдастырылған өрт деп болжап отыр.
